శరద్ పవార్ తో తెరాస బృందం భేటీ

న్యూఢిల్లీ: తెలంగాణ రాష్ట్ర సాధన కోసం ఆమరణ నిరాహార దీక్ష చేస్తున్న నేపథ్యంలో తెలంగాణ రాష్ట్ర సమితి (తెరాస) ప్రతినిధి బృందం గురువారం ఉదయం కేంద్ర వ్యవసాయ శాఖ మంత్రి శరద్ పవార్ తో సమావేశమయ్యారు. మాజీ పార్లమెంటు సభ్యుడు వినోద్ కుమార్ నేతృత్వంలోని ఐదుగురు తెరాస ప్రతినిధుల బృందం బుధవారం రాత్రి న్యూఢిల్లీకి వచ్చింది. తెలంగాణలోని తాజా పరిణామాలను తెరాస నాయకులు శరద్ పవార్ కు వివరించారు.

తెరాస ప్రతినిధులు కేంద్ర మంత్రి మమతా బెనర్జీ, ఆర్జెడీ నేత లాలూ ప్రసాద్ యాదవ్ లతో కూడా భేటీ అయ్యే అవకాశం ఉంది. అదే విధంగా బిజెపి అగ్రనేతలు ఎల్ కె అద్వానీ తదితరులతో వారు మాట్లాడే అవకాశం ఉంది. తెలంగాణ రాష్ట్ర ఏర్పాటుకు యుపిఎ ప్రభుత్వంపై ఒత్తిడి తేవాలని వారు బిజెపి అగ్రనేతలను కోరే అవకాశం ఉంది. తెలంగాణ కాంగ్రెసు సీనియర్లతో వారు మాట్లాడే అవకాశాలు కూడా ఉన్నాయని అంటున్నారు. కెసిఆర్ దీక్ష విరమించి చర్చలకు ఢిల్లీ రావాలని కాంగ్రెసు సీనియర్లు కోరుతున్న నేపథ్యంలో ఈ భేటీకి అవకాశం ఉందని అంటున్నారు.