దీక్ష విరమించను: దానంతో కెసిఆర్

హైదరాబాద్: తాను దీక్ష విరమించబోనని తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు రాష్ట్ర ఆరోగ్య శాఖ మంత్రి దానం నాగేందర్ తో చెప్పారు. నిజాం వైద్య విజ్ఝాన సంస్థ (నిమ్స్)లో చికిత్స పొందుతూ నిరాహార దీక్ష చేస్తున్న కెసిఆర్ ను ఆయన శుక్రవారం పరామర్శించారు. దీక్ష విరమించాలని దానం నాగేందర్ ప్రభుత్వ దూతగా కెసిఆర్ ను కోరారు. తెలంగాణపై స్ఫష్టమైన ప్రకటన వెలువడే వరకు దీక్ష విరమించబోనని చెబుతూ దీక్ష విరమణకు కెసిఆర్ నిరాకరించారు. దానం నాగేందర్ తో చర్చించడానికి కూడా కెసిఆర్ నిరాకరించారు. అంతకు మించి కెసిఆర్ మాట్లాడే స్థితిలో లేకపోవడంతో ఐదు నిమిషాల్లోనే దానం నాగేందర్ వెనుదిరిగి వెళ్లిపోయారు.

కాగా, నిమ్స్ వద్ద తీవ్ర ఉద్రిక్త పరిస్థితి నెలకొంది. కెసిఆర్ చికిత్స పొందుతున్న బ్లాక్ లోకి దూసుకెళ్లడానికి విద్యార్థులు ప్రయత్నించారు. వారిని పోలీసులు అడ్డుకునే ప్రయత్నం చేశారు. విద్యార్థులు పోలీసులకు వ్యతిరేకంగా నినాదాలుచేశారు. కెసిఆర్ కు ఏమైనా జరిగితే తీవ్ర పరిణామాలుంటాయని వారు హెచ్చరించారు. తోపులాట, వాగ్వివాదం చోటు చేసుకుంది. నిమ్స్ ఆవరణలోని ఆంధ్రా బ్యాంక్ పేరును తెలంగాణ బ్యాంక్ గా మార్చారు.

కెసిఆర్ కు వైద్యులు సెలైన్ ఎక్కించడానికి ప్రయత్నించారు. సెలైన్ ఎక్కించుకోవడానికి కెసిఆర్ నిరాకరించారు. కెసిఆర్ కు లివర్ ఇన్ ఫెక్షన్ వచ్చినట్లు జరుగుతున్న ప్రచారం నిజం లేదని వైద్యులు స్పష్టంచేశారు. కెసిఆర్ శరీర భాగాలన్నీ సజావుగానే ఉన్నాయని వారు చెప్పారు. అయితే ఘన పదార్థాలు తీసుకోకపోవడం వల్ల కెసిఆర్ నీరసంగా ఉన్నారని వారు చెప్పారు.