బాబు జవాబుతో సంతృప్తి చెందలేదు: జెఎసి

హైదరాబాద్: తెలంగాణ విషయంలో తెలుగుదేశం పార్టీ అధ్యక్షుడు నారా చంద్రబాబునాయుడి సమాధానంతో తాము సంతృప్తి చెందలేదని తెలంగాణ విద్యార్థి సంఘాల సంయుక్త కార్యాచరణ సమితి (జెఎసి) నాయకులు చెప్పారు. జెఎసి ప్రతినిధులు శుక్రవారం చంద్రబాబును కలిసి తెలంగాణకు మద్దతివ్వాలని కోరారు. అయితే తెలంగాణ విషయంలో చంద్రబాబు సానుకూలంగా ప్రతిస్పందించారని వారు చెప్పారు. చంద్రబాబుతో భేటీ తర్వాత జెఎసి నాయకులు రాజారాం తదితరులు మీడియా ప్రతినిధులతో మాట్లాడారు. శాసనసభలో తెలంగాణ ఏర్పాటుకు తీర్మానం ప్రతిపాదిస్తే మద్దతివ్వాలని తాము చంద్రబాబును కోరినట్లు వారు తెలిపారు.

కేవలం తీర్మానానికి మద్దతిస్తామని చెప్పినంత మాత్రాన సరిపోదని, ప్రభుత్వంపై తెలంగాణ కోసం ఒత్తిడి తేవాలని వారు అభిప్రాయపడ్డారు. అన్ని పార్టీల నాయకులను కూడా తాము కలుస్తామని, తెలంగాణకు మద్దతు కోరుతామని వారన్నారు. తెలంగాణ వ్యతిరేకులుగా మిగిలిపోవద్దని తాను కోరుతామని వారు చెప్పారు. విద్యార్థులపై జరుగుతున్న పోలీసు నిర్బంధాన్ని వ్యతిరేకించాలని తాము చంద్రబాబును కోరినట్లు వారు తెలిపారు.