కెసిఆర్ తో చర్చలుండవు: పొన్నాల

హైదరాబాద్: ఆమరణ నిరాహార దీక్ష చేస్తున్న తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో చర్చలుండవని రాష్ట్ర భారీ నీటి పారుదల శాఖ మంత్రి పొన్నాల లక్ష్మయ్య చెప్పారు. ముఖ్యమంత్రి కె.రోశయ్య శుక్రవారం తెలంగాణ మంత్రులతో సమావేశమయ్యారు. సమావేశానంతరం పొన్నాల లక్ష్మయ్య మీడియా ప్రతినిధులతో మాట్లాడారు. తెలంగాణ పట్ల కాంగ్రెసు చిత్తశుద్ధితో ఉందని, అయితే తెలంగాణ రాష్ట్ర ఏర్పాటు అంత తేలికగా సాధ్యమయ్యేది కాదని ఆయన అన్నారు.

పరిస్థితిని అర్థం చేసుకుని కెసిఆర్ దీక్ష విరమించాలని ఆయన కోరారు. కెసిఆర్ దీక్ష వల్ల ఉద్రిక్తతలు పెరుగుతున్నాయని, విద్యార్థులు రెచ్చిపోతున్నారని, విద్యార్థులు నష్టపోయే పరిస్థితి ఏర్పడిందని ఆయన అన్నారు. తెలంగాణకు అనుకూలంగా అన్ని పార్టీలను ప్రభావితం చేసే విధంగా చర్చల ద్వారా సమస్యను పరిష్కరించుకోవాల్సిన అవసరం ఉంటుందని ఆయన అన్నారు. శాంతియుత పద్ధతిలోనే కెసిఆర్ తెలంగాణ సమస్య పరిష్కారానికి కృషి చేయాలని ఆయన సూచించారు.