ఈ స్థితిలో దీక్ష విరమించను: కె చంద్రశేఖర రావు

హైదరాబాద్: విద్యార్థులు తెలంగాణ కోసం ఉవ్వెత్తున ఉద్యమాన్ని నడిపిస్తున్న ప్రస్తుత తరుణంలో తాను దీక్ష విరమించేది లేదని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చెప్పారు. ఈ విషయాన్ని ఆయన తనయుడు, శాసనభ్యుడు కెటి రామారావు తెలంగాణ విద్యార్థులకు వివరించారు. నిమ్స్ లోకి చొచ్చుకుపోవడానికి ప్రయత్నించిన విద్యార్థులను శాంతింపజేయడానికి కెటి రామారావు వచ్చి కెసిఆర్ చెబుతున్న మాటలను, ఆయన పరిస్థితిని విద్యార్థులకు వివరించారు. తెలంగాణ ఇప్పుడు కాకపోతే మరెప్పుడూ రాదని కెసిఆర్ అన్నారు. విద్యార్థులు శివమెత్తుతున్నారని, కాంగ్రెసు నాయకులను నిలదీస్తున్నారని, తాను దీక్ష విరమించి వారు నొచ్చుకునేట్లు వ్యవహరించలేనని ఆయన అన్నారు.

కెసిఆర్ ఆరోగ్యం పూర్తిగా క్షీణించిందని, కెసిఆర్ బలహీనంగా మారారని కెటి రామారావు చెప్పారు. కెసిఆర్ ఆరు కిలోల బరువు తగ్గారని ఆయన చెప్పారు. కెసిఆర్ కు ఏ క్షణంలో ఏమైనా జరగవచ్చునని వైద్యులు చెబుతున్నారని ఆయన చెప్పారు. గత వారం రోజులుగా అనూహ్యమైన పరిణామాలు చోటు చేసుకున్నాయని, ఆంధ్రప్రదేశ్ రాష్ట్ర చరిత్రలో ఎన్నడూ జరగని దృశ్యాలను చూస్తున్నామని ఆయన చెప్పారు. మన జీవిత కాలంలో ఇటువంటి పరిణామాలు చూస్తామో లేదో తెలియదని ఆయన అన్నారు.