కాదంటే సోనియా చెప్పాలి: చంద్రశేఖర్

హైదరాబాద్: తెలంగాణపై కాంగ్రెసు అధ్యక్షురాలు సోనియా గాంధీ వెంటనే ప్రకటన చేయాలని తెలంగాణ రాష్ట్ర సమితి నాయకుడు, మాజీ మంత్రి ఎ. చంద్రశేఖర్ డిమాండ్ చేశారు. తెలంగాణ ప్రజలకు ఇచ్చిన హామీ మేరకు సోనియా తెలంగాణ రాష్ట్ర ఏర్పాటుకు కట్టుబడి ఉంటారా, లేదా చెప్పాలని ఆయన డిమాండ్ చేశారు. తెలంగాణ ఇవ్వడం సాధ్యం కాదని చెప్పినా ఫరవా లేదని ఆయన సోమవారం మీడియా ప్రతినిధులతో అన్నారు. తాము తెలంగాణ ఇవ్వడానికి సిద్ధంగా లేమని సోనియా చెప్తే కాళ్లు పట్టుకునైనా తమ నేత కె. చంద్రశేఖర రావుతో దీక్ష విరమింపజేస్తామని, మరో రూపంలో పోరాటానికి దిగుతామని ఆయన అన్నారు.

కెసిఆర్ కంట తడి పెట్టడం తప్ప ఏమీ మాట్లాడడం లేదని ఆయన అన్నారు. తమకు కాకమ్మ కబుర్లు అవసరం లేదని, తెలంగాణ ఇస్తారో ఇవ్వరో చెప్పాలని ఆయన అన్నారు. ఉస్మానియా విశ్వవిద్యాలయంలో పోలీసులు బీభత్సం సృష్టిస్తున్నారని ఆయన విమర్శించారు. శాంతియుతంగా ఆందోళన చేస్తున్న విద్యార్థులను చెదరగొడుతున్నారని ఆయన అన్నారు. తెలంగాణ కోసం రాజీనామా చేసిన ఎస్సై శ్యాంసుందర్ ను పోలీసులు నిర్బంధించారని ఆయన ఆరోపించారు. శ్యాంసుందర్ ను వెంటనే విడుదల చేయాలని ఆయన డిమాండ్ చేశారు.