నిలకడగా కెసిఆర్ ఆరోగ్య పరిస్థితి

హైదరాబాద్: ఆమరణ నిరాహార దీక్ష చేస్తున్న తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఆరోగ్య పరిస్థితి నిలకడగానే ఉందని నిజాం వైద్య సంస్థ (నిమ్స్) వైద్యులు సోమవారం ఉదయం చెప్పారు. ఆదివారం సాయంత్రం కెసిఆర్ ఫొటోలను వైద్యులు మీడియాకు విడుదల చేశారు. రాత్రి చలి జ్వరం వచ్చినట్లు సమాచారం. అది నియంత్రణలోకి వచ్చినట్లు వైద్యులు చెప్పారు ఆహారం తీసుకోకపోవడం వల్ల నీరసంగా ఉన్నారని వారు చెప్పారు. వ్యాధి నిరోధక శక్తి తగ్గుతోందని వారంటున్నారు.

దీక్ష కొనసాగితే ప్రమాదం వాటిల్లవచ్చునని చెబుతున్నారు. బిపి, షుగర్, ఉష్ణోగ్రత సాధారణ స్థితిలో ఉన్నాయని వైద్యులు చెప్పారు. కెసిఆర్ ఆరోగ్య పరిస్థితి ఆదివారం రాత్రి ఆందోళన కలిగించిందని శాసనసభ్యుడు హరీష్ రావు చెప్పారు. రాత్రి కెసిఆర్ మీడియాతో మాట్లాడినట్లు ఆయన తెలిపారు. ప్రస్తుతం కెసిఆర్ ఆరోగ్యం బాగానే ఉందని ఆయన అన్నారు. కాగా, కెసిఆర్ ఆరోగ్య పరిస్థితి గురించి వైద్యులు నిజం చెప్పడం లేదని ఆయన తనయుడు, శాసనసభ్యుడు కెటి రామారావు విమర్శిస్తున్నారు. ప్రతి రెండు గంటలకు కెసిఆర్ ఆరోగ్య పరిస్థితిపై వైద్యులు వివరిస్తున్నారు.