తెలంగాణకు పరిష్కారం వస్తుంది: కెకె

న్యూఢిల్లీ: తెలంగాణకు తమ పార్టీ అధిష్టానం పరిష్కారం కనుక్కుంటోందని, తప్పకుండా పరిష్కారం లభిస్తుందని కాంగ్రెసు సీనియర్ నేత కె. కేశవరావు చెప్పారు. తెలంగాణపై కసరత్తు జరుగుతోందని ఆయన మీడియా ప్రతినిధులతో చెప్పారు. ఏదో ఒక్కటి పార్టీ అధిష్టానం నుంచి వస్తుందని ఆయన చెప్పారు. పరిస్థితి తీవ్రతను పార్టీ అధిష్టానం గుర్తించిందని ఆయన చెప్పారు. తాను కాంగ్రెసు ఆంధ్రప్రదేశ్ వ్యవహారా ఇంచార్జీ వీరప్ప మొయిలీతో మాట్లాడినట్లు తెలిపారు.

కాగా, తెలంగాణపై తమ పార్టీ సానుకూలంగానే ఉన్నప్పటికీ ఇప్పటికిప్పుడు రాష్ట్ర ఏర్పాటు సాధ్యం కాదని ఎఐసిసి వర్గాలు చెబుతున్నాయి. తెలంగాణపై వీరప్ప మొయిలీని కలుసుకుని పరిష్కరించుకోవాలని కాంగ్రెసు అధ్యక్షురాలు సోనియా గాంధీ రాజకీయ సలహాదారు రాష్ట్ర కాంగ్రెసు నాయకులకు సూచిస్తున్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో దీక్ష విరమింపజేయాలని సూచిస్తున్నారు. కాగా, ఉస్మానియా విశ్వవిద్యాలయంలో పోలీసుల చర్యను కాంగ్రెసు సీనియర్ నాయకుడు వి. హనుమంతరావు వ్యతిరేకించారు. విద్యార్థులను రెచ్చగొట్ట వద్దని ఆయన సూచించారు. విద్యార్థులను రెచ్చగొడితే పరిస్థితి చేయి దాటుతుందని ఆయన అన్నారు.