తెరాస ఎమ్మెల్యేల్లారా, ఖబర్దార్: దానం

హైదరాబాద్: తెలంగాణ రాష్ట్ర సమితి (తెరాస) శాసనసభ్యులను రాష్ట్ర ఆరోగ్య శాఖ మంత్రి దానం నాగేందర్ తీవ్రంగా హెచ్చరించారు. తన జోలికి వస్తే ఖబర్దార్ అంటూ ఆయన హెచ్చరికలు జారీ చేశారు. తాము తలుచుకుంటే తెలంగాణ శాసనసభ్యులు హైదరాబాదులో తిరగలేరని ఆయన అన్నారు. తన నోరు నొక్కేయడానికి ప్రయత్నిస్తే సహించబోనని, తెరాస ఎమ్యెల్యేలను హైదారాబాదులో తిరగనివ్వనని ఆయన అన్నారు.

తనపై దాడి చేయడం ద్వారా తెరాస తన ఉద్యమాన్ని తానే నీరు గార్చుకోవద్దని ఆయన సలహా ఇచ్చారు. వారి వాదనను వారు వినిపించాలని, తన వాదనను తాను వినిపిస్తానని, తన వాదనను అడ్డుకునే హక్కు ఎవరికీ లేదని ఆయన అన్నారు. తెలంగాణ ఏర్పాటు చేస్తే గ్రేటర్ హైదరాబాదును విడిగా చేయాలని తాను మాట్లాడతానని, అయితే తమ కాంగ్రెసు పార్టీ అధిష్టానం ఏ నిర్ణయం తీసుకుంటే దానికి కట్టుబడి ఉంటానని ఆయన చెప్పారు. ఇద్దరు విద్యార్థులు తన వద్ద లేరని, వారిని పోలీసులు అరెస్టు చేశారని ఆయన చెప్పారు. విద్యార్థులు తన వద్దకు ఎప్పుడైనా రావచ్చునని ఆయన చెప్పారు. ఇద్దరు విద్యార్థులను దానం అనుచరులు నిర్బంధించినట్లు ఆరోపణలు వచ్చాయి.