సోనియాకు ఫోన్ లో కెసిఆర్ కృతజ్ఞతలు

హైదరాబాద్: తెలంగాణ రాష్ట్ర ఏర్పాటుకు సానుకూల నిర్ణయం తీసుకున్నందుకు తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు ఫోన్ చేసి కాంగ్రెసు అధ్యక్షురాలు సోనియా గాంధీకి కృతజ్ఞతలు తెలిపారు. బిజెపి అగ్రనేత ఎల్ కె అద్వానీకి కూడా ఆయన ఫోన్ చేసి కృతజ్ఝతలు తెలిపారు. కాంగ్రెసు పార్టీ అధిష్టానానికి చెందిన అహ్మద్ పటేల్, ప్రణబ్ ముఖర్జీ, చిదంబరాలకు కూడా ఆయన ఫోన్ చేసి కృతజ్ఞతలు తెలిపారు.

అలాగే, రాష్ట్రానికి చెందిన తెలుగుదేశం అధ్యక్షుడు నారా చంద్రబాబునాయుడు, బిజెపి అధ్యక్షుడు బండారు దత్తాత్రేయ, సిపిఐ రాష్ట్ర కార్యదర్శి నారాయణలకు కూడా ఆయన ఫోన్ చేసి కృతజ్ఞతలు తెలిపారు. కాగా, ముఖ్యమంత్రి కె. రోశయ్యకు తెలంగాణ రాష్ట్ర సమితి (తెరాస) శాసనసభ్యులు కృతజ్ఢతలు తెలిపారు. శాసనసభలో తెలంగాణ తీర్మానం పెట్టేందుకు కాంగ్రెసు అధిష్టానం అంగీకరించడం పట్ల వారు హర్షం వ్యక్తం చేశారు. కెసిఆర్ దీక్షకు మద్దతు తెలిపినందుకు తెలుగుదేశం అధ్యక్షుడు నారా చంద్రబాబు నాయుడికి కూడా వారు కృతజ్ఞతలు తెలిపారు.