రాజీనామాలు చేయడం తప్పు: జానా

హైదరాబాద్: తెలంగాణ రాష్ట్ర ఏర్పాటు ప్రక్రియను వ్యతిరేకిస్తూ కోస్తాంధ్ర, రాయలసీమ శాసనభ్యులు రాజీనామాలు చేయడంపై మాజీ హోం మంత్రి, కాంగ్రెసు సీనియర్ శాసనసభ్యుడు కె. జానారెడ్డి అసంతృప్తి వ్యక్తం చేశారు. తెలంగాణపై తాము పోరాటం చేసి, సమస్యలను అధిష్టానం దృష్టికి తీసుకుని వెళ్లామని, రాజీనామాలు చేయలేదని ఆయన శుక్రవారం మీడియా ప్రతినిధులతో అన్నారు. తెలంగాణకు అన్ని పార్టీలు మద్దతిచ్చిన తర్వాత ఇలా ప్రవర్తించడం సరి కాదని ఆయన అన్నారు.

తెలంగాణ కాంగ్రెసు శాసనసభ్యులు శానససభ ఆవరణలో సమావేశమై తాజా పరిస్థితిని సమీక్షించారు. రాజకీయ సంక్షోభం సృష్టించేందుకే తెలుగుదేశం అధ్యక్షుడు నారా చంద్రబాబు నాయుడు రాజీనామాల డ్రామా ఆడుతున్నారని వారు విమర్శించారు. దీన్ని తాము సమిష్టిగా ఎదుర్కుంటామని వారన్నారు. భారీ నీటి పారుదల శాఖ మంత్రి పొన్నాల లక్ష్మయ్య నేతృత్వంలో తెలంగాణకు చెందిన అన్ని పార్టీల శాసనసభ్యులు సమావేశమయ్యారు.