బాబు, జగన్ తర్వాతే చిరు: కన్నబాబు

హైదరాబాద్: సమైక్యాంధ్రుకు మద్దతుగా చిరంజీవి రాజీనామా చేయాలనే డిమాండ్ ను ప్రజారాజ్యం పార్టీ శాసనసభ్యుడు కన్నబాబు తీవ్రంగా వ్యతిరేకించారు. సమైక్యాంధ్రకు మద్దతుగా రాజీనామా చేయాలని రాయలసీమ హక్కుల సమితి కన్వీనర్, కాంగ్రెసు శాసనసభ్యుడు టిజి వెంకటేష్ చిరంజీవిని డిమాండ్ చేశారు. చిరు తిరుపతి శాసనసభ్యుడిగా కొనసాగకూడదని ఆయన శుక్రవారం అన్నారు. దీన్ని కన్నబాబు వ్యతిరేకించారు. తెలుగుదేశం పార్టీ అధ్యక్షుడు నారా చంద్రబాబు నాయుడు, కడప పార్లమెంటు సభ్యుడు వైయస్ జగన్ రాజీనానా చేస్తే తమ పార్టీ నేత చిరంజీవి రాజీనామా చేస్తారని ఆయన అన్నారు.

చిరంజీవి రాజీనామాను డిమాండ్ చేస్తున్నవారు జగన్, చంద్రబాబుల రాజీనామాలను కూడా డిమాండ్ చేయాలని ఆయన అన్నారు. రాజీనామా చేయాలని చిరంజీవి దిష్టిబొమ్మను దగ్దం చేయడాన్ని కూడా ఆయన ఖండించారు. తమ నేత చిరంజీవి దిష్టిబొమ్మలను దగ్ధం చేస్తే సహించబోమని ఆయన హెచ్చరించారు. చిరంజీవి రాజీనామా చేయాలని డిమాండ్ చేస్తూ తిరుమల తిరుపతి దేవస్థానం (టిటిడి) ఉద్యోగులు ఆందోళనకు దిగారు.