వేర్పాటువాదులు నన్ను ఆపలేరు: లగడపాటి

హైదరాబాద్: వేర్పాటవాద శక్తులు తనను హైదరాబాద్ రాకుండా అడ్డుకోలేవని కాంగ్రెసు పార్లమెంటు సభ్యుడు లగడపాటి రాజగోపాల్ అన్నారు. తనను పోలీసులు అదుపులో తీసుకున్న తర్వాత ఆయన సోమవారం ఉదయం మీడియా ప్రతినిధులతో మాట్లాడారు. తనను ఎంతకాలం నిలువరిస్తారో చూస్తానని ఆయన అన్నారు. తనను పోలీసులు ఎందుకు అదుపులోకి తీసుకున్నారో అర్థం కావడం లేదని ఆయన అన్నారు.

ఓ పద్ధతి ప్రకారం తాను ఉద్యమం చేయాలని అనుకుంటుంటే తనను అరెస్టు చేశారని ఆయన విమర్శించారు. కొడుకులెందరున్నా తల్లి ఒక్కటే అనే నినాదంతో తాను ముందుకు వెళ్తానని ఆయన చెప్పారు. లగడపాటి రాజగోపాల్ అరెస్టును కాంగ్రెసు శాసనసభ్యుడు ద్రోణంరాజు శ్రీనివాస్ ఖండించారు. సమైక్యాంధ్ర నినాదంతో ముందుకు వచ్చిన లగడపాటి అరెస్టు చేయడం సరికాదని కాంగ్రెసు నాయకుడు తలసిరెడ్డి అన్నారు.