దీక్ష విరమించండి: లగడపాటికి సిఎం సూచన

హైదరాబాద్: సమైక్యాంధ్ర నినాదంతో తలపెట్టిన నిరాహార దీక్ష విరమించాలని ముఖ్యమంత్రి కె.రోశయ్య కాంగ్రెసు పార్లమెంటు సభ్యుడు లగడపాటి రాజగోపాల్ కు సూచించారు. సమైక్య నినాదంతో ఆమరణ నిరాహార దీక్ష తలపెట్టిన లగడపాటిని పోలీసులు లగడపాటిని సోమవారం ముఖ్యమంత్రి రోశయ్య వద్దకు తీసుకొచ్చారు. లగడపాటి రోశయ్యతో భేటీ అయ్యారు.

కాగా, ఢిల్లీ నుంచి హైదరాబాదుకు చేరుకున్న రాజగోపాల్ ను పోలీసులు శంషాబాద్ విమానాశ్రయం వద్ద అదుపులోకి తీసుకున్నారు. అనంతరం పహడీషరీఫ్ పోలీసు స్టేషన్ కు తరలించారు. దాంతో లగడపాటి పహడీషరీఫ్ పోలీసు స్టేషనులో పడుకున్నారు. ఆ తర్వాత లగడపాటిని ముఖ్యమంత్రి వద్దకు తీసుకెళ్లారు. ముఖ్యమంత్రి సూచనతో లగడపాటి రాజగోపాల్ దీక్ష చేయాలనే నిర్ణయాన్ని ఉపసంహరించుకునే యోచనలో పడ్డారు.