చంద్రబాబు తెలంగాణ డ్రామా: దానం

హైదరాబాద్: తెలంగాణ విషయంలో తెలుగుదేశం పార్టీ అధ్యక్షుడు నారా చంద్రబాబు నాయుడు ఆడుతున్న డ్రామాలను ప్రజలు విశ్వసించరని రాష్ట్ర ఆరోగ్య శాఖ మంత్రి దానం నాగేందర్ వ్యాఖ్యానించారు. చంద్రబాబు జిమ్మిక్కులు చేస్తున్నారని ఆయన మంగళవారం మీడియా ప్రతినిధులతో అన్నారు. శాసనసభలో తెలంగాణ తీర్మానాన్ని ప్రతిపాదిస్తే బలపరుస్తామని ముఖ్యమంత్రి కె.రోశయ్య ఏర్పాటు చేసిన అఖిల పక్ష సమావేశంలో తెలుగుదేశం పార్టీ ప్రతినిధులు చెప్పారని, ఇప్పుడు చంద్రబాబు మాట మార్చారని ఆయన అన్నారు.

హైదరాబాద్ ప్రజలు, తెలంగాణ ప్రజలను ఎలాగూ తనను నమ్మడం లేదని గుర్తించిన చంద్రబాబు కోస్తా, రాయలసీమ ప్రజలను ఆకర్షించడానికి ఇప్పుడు మాట మారుస్తున్నారని ఆయన విమర్శించారు. చంద్రబాబు తన కచ్చితమైన వైఖరిని వెల్లడించాలని ఆయన డిమాండ్ చేశారు. చంద్రబాబు ఏ వైఖరి తీసుకుంటారో కూడా నమ్మే పరిస్థితి లేదని ఆయన అన్నారు. చంద్రబాబు విశ్వసనీయత కోల్పోయారని ఆయన వ్యాఖ్యానించారు.