తెలంగాణలో లగడపాటి కాలు పెట్టలేరు: దామోదర్ రెడ్డి

హైదరాబాద్: కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ తెలంగాణ జిల్లాల్లో కాలు పెట్టలేరని ఆ పార్టీ సీనియర్ శాననసభ్యుడు, మాజీ మంత్రి ఆర్. దామోదర్ రెడ్డి హెచ్చరించారు. తెలంగాణలో లగడపాటిని తిరగనివ్వబోమని ఆయన అన్నారు. ఇచ్చాపురం నుంచి మొదలు పెట్టి రాష్ట్రంలోని 23 జిల్లాల్లో తాను పర్యటిస్తానని లగడపాటి చేసిన ప్రకటనపై ఆయన మంగళవారం మీడియా ప్రతినిధుల సమావేశంలో ప్రతిస్పందించారు. తమ పార్టీ కడప పార్లమెంటు సభ్యుడు వైయస్ జగన్ తన వైఖరి మార్చుకోవాలని ఆయన విజ్ఞప్తి చేశారు. తాము తెలంగాణ రాష్ట్రాన్ని కోరుకుంటున్నామని ఆయన చెప్పారు. సమైక్యవాదులు చేసేది సమైక్యాంధ్ర ఉద్యమం కాదని, తెలంగాణ వ్యతిరేక ఉద్యమమని ఆయన విమర్శించారు.

కడప పార్లమెంటు సభ్యుడు వైయస్ జగన్ తెలంగాణ వ్యతిరేక వైఖరికి నిరననగా హైదరాబాదులోని ఉస్మానియా విశ్వవిద్యాలయం విద్యార్థులు ఆందోళనకు దిగారు. సమైక్యాంధ్రకు జగన్ మద్దతు పలకడాన్ని వారు వ్యతిరేకించారు. అలాగే తెలుగుదేశం అధ్యక్షుడు నారా చంద్రబాబు నాయుడు తెలంగాణపై తన వైఖరిని మార్చుకోవాలని ఆయన డిమాండ్ చేశారు.