చిరు ఫ్యామిలీ సినిమాలు అడ్డుకుంటాం: జెఎసి

హైదరాబాద్: తెలంగాణకు వ్యతిరేకంగా సమైక్యాంధ్ర నినాదం తీసుకుంటే ప్రజారాజ్యం పార్టీ అధ్యక్షుడు చిరంజీవి కుటుంబ సభ్యుల సినిమాలను తెలంగాణలో ఆడనివ్వబోమని విద్యార్థుల సంయుక్త కార్యాచరణ సమితి (జెఎసి) హెచ్చరించింది. కాకతీయ, ఉస్మానియా విశ్వవిద్యాలయం విద్యార్థులు కూడా అదే హెచ్చరిక చేశారు. తెలంగాణలో అల్లు అరవింద్ కు చెందిన గీతా ఆర్ట్స్ సినిమాలను, చిరంజీవి కుటుంబ సభ్యులు పవన్ కళ్యాణ్, అల్లు అర్జున్, రామ్ చరణ్ తేజా సినిమాలను బహిష్కరిస్తామని జెఎసి ప్రకటించింది. ఎన్నికలకు ముందు తెలంగాణకు అనుకూలంగా నిర్ణయం తీసుకున్న తెలుగుదేశం పార్టీ అధ్యక్షుడు చంద్రబాబునాయుడు కూడా అదే వైఖరి తీసుకుంటున్నారని, దాన్ని తాము తీవ్రంగా ఖండిస్తున్నామని జెఎసి నాయకుడు వాసుదేవ రెడ్డి అన్నారు.

చిరంజీవి ఆంధ్ర వ్యక్తి కాబట్టి అక్కడి నాయకులకు తలొగ్గి నిర్ణయం మార్చుకునేందుకు సిద్ధపడ్డారని ఆయన విమర్శించారు. కావాలంటే చిరంజీవి రాయలసీమ, కోస్తాంధ్రలో మాత్రమే పార్టీని పెట్టుకోవచ్చునని ఆయన అన్నారు. తెలంగాణలో ఆ పార్టీకి చెందిన నాయకులంతా రాజీనామాలు చేయాలని ఆయన డిమాండ్ చేశారు. ఆ ప్రాంతాల రాజకీయ నాయకులు పార్టీలకు అతీతంగా ఏకమైనట్లు తెలంగాణ నాయకులు కూడా ఏకం కావాలని ఆయన అన్నారు.