సమైక్యాంధ్ర కోసం చిరంజీవి రాజీనామా

హైదరాబాద్: తన శాసనసభ సభ్యత్వానికి ప్రజారాజ్యం పార్టీ అధినేత చిరంజీవి రాజీనామా చేశారు. సమైక్యాంధ్ర కోసం ఉద్యమించడానికి ఆయన గురువారం రాజీనామా చేశారు. తన రాజీనామా లేఖను పార్టీ నాయకుల ద్వారా స్పీకర్ కిరణ్ కుమార్ రెడ్డికి పంపించారు. తమ పార్టీ వైఖరి మారిందని, అందువల్ల నైతిక బాధ్యత వహించి తాను రాజీనామా చేస్తున్నానని ఆయన మీడియా ప్రతినిధుల సమావేశంలో చెప్పారు. మెజారిటీ ప్రజల అభిప్రాయానికి తలొగ్గి తాను సమైక్యాంధ్రకు అనుకూలంగా నిర్ణయం తీసుకున్నట్లు ఆయన తెలిపారు. పార్టీలో విస్తృతంగా చర్చించిన తర్వాతనే ఈ నిర్ణయం తీసుకున్నట్లు ఆయన చెప్పారు.

చిరంజీవి నిర్ణయాన్ని వ్యతిరేకిస్తూ తెలంగాణ ఉద్యమకారులు ప్రజారాజ్యం పార్టీ కార్యాలయం వద్ద ఆందోళనకు దిగారు. చిరంజీవికి వ్యతిరేకంగా నినాదాలు చేశారు. దీంతో తీవ్ర ఉద్రిక్తత నెలకొంది. ఆందోళనకారులు పోలీసులు అరెస్టు చేసి పోలీసు స్టేషన్ కు తరలించారు. మీడియా ప్రతినిధులను కూడా పోలీసులు తోసేశారు. ముందు జాగ్రత్త చర్యగానే తాము అరెస్టులు చేసినట్లు పోలీసులు చెప్పారు.