కెసిఆర్ ఊసరవెల్లి, అవకాశవాది: అనంత

న్యూఢిల్లీ: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును కాంగ్రెసు పార్లమెంటు సభ్యుడు అనంత వెంకట్రామి రెడ్డి ఊసరవెల్లిగా, అవకాశవాదిగా అభివర్ణించారు. ఒకసారి కెసిఆర్ ఎఐసిసి అధ్యక్షురాలు సోనియా గాంధీని ప్రశంసిస్తారని, మరోసారి తిడతారని ఆయన శుక్రవారం మీడియా ప్రతినిధులతో అన్నారు. తెలుగుదేశం పార్టీ అంటున్నట్లు డిసెంబర్ 9వ తేదీ బ్లాక్ డే కాదని, అన్ని పార్టీల నిజ స్వరూపాలు బయటపడిన రోజని ఆయన అన్నారు. శాంతియుతంగా ఉద్యమం చేయాలని ఆయన ప్రజలను కోరారు.

రాష్ట్ర విభజనపై తమ పార్టీ అధిష్టానం ఏకాభిప్రాయ సాధన కోసం తర్జన భర్జనలు పడుతోందని ఆయన చెప్పారు. పరిస్థితిని ఎలా చక్కదిద్దాలనే విషయంపై ఆలోచిస్తోందని ఆయన చెప్పారు. ఏకాభిప్రాయంతో మాత్రమే రాష్ట్ర విభజన సాధ్యమవుతుందని ఆయన చెప్పారు.