పరిటాల సునీత ఆమరణ దీక్ష భగ్నం

హైదరాబాద్: సమైక్యాంధ్ర నినాదంతో అనంతపురం ఆమరణ నిరాహార దీక్షకు దిగిన తెలుగుదేశం పార్టీ శాసనసభ్యురాలు పరిటాల సునీత ఆమరణ నిరాహార దీక్షను పోలీసులు శుక్రవారం భగ్నం చేశారు. సునీతతో పాటు ఐదుగురు గత ఐదు రోజులుగా ఆమరణ నిరాహార దీక్ష చేస్తున్నారు. వారి ఆరోగ్యం క్షీణించడంతో అదుపులోకి తీసుకుని వారిని ప్రభుత్వాస్పత్రికి తరలించారు. గురువారం రాత్రి వైద్యులు పరీక్షించి ఆరోగ్యం క్షీణించిందని, లోబీపీతో బాధపడుతున్నారని చెప్పారు. దాంతో అప్పుడే పోలీసులు ఆస్పత్రికి తరలించడానికి ప్రయత్నించారు. అయితే అందుకు ఆమె నిరాకరించారు.

శుక్రవారంనాడు పోలీసులు దీక్షా శిబిరాన్ని చుట్టముట్టి సునీతతో సహా మిగతా వారిని అదుపులోకి తీసుకుని ప్రభుత్వాస్పత్రికి తరలించారు. ఈ సమయంలో తెలుగుదేశం కార్యకర్తలు అడ్డుకోవడానికి ప్రయత్నించారు. అయితే పోలీసులు వారిని చెదరగొట్టి పరిటాల సునీతను అదుపులోకి తీసుకున్నారు.