బెజవాడలోనే లగడపాటి: కొద్దిసేపట్లోనే బయటకు

విజయవాడ: కాంగ్రెసు పార్లమెంటు సభ్యుడు లగడపాటి రాజగోపాల్ విజయవాడ పరిసరాల్లోనే ఉన్నట్లు పోలీసులకు సమాచారం అందింది. దీంతో పోలీసులు ఊపిరి పీల్పుకున్నారు. పథకం ప్రకారం ఇద్దరు వ్యక్తుల సహకారంతో లగడపాటి పారిపోయినట్లు భావిస్తున్నారు. హైదరాబాదులోని నిజాం వైద్య విజ్ఞాన సంస్థ (నిమ్స్)కు తరలించేందుకు ముఖ్యమంత్రి కె. రోశయ్య అంగీకరించారు. దీంతో లగడపాటి అజ్ఞాతం నుంచి బయటకు రావచ్చునని భావిస్తున్నారు. మంత్రి పార్థసారథి ముఖ్యమంత్రి రోశయ్యతోనూ ఆరోగ్య శాఖ మంత్రి దానం నాగేందర్ తోనూ మాట్లాడారు. కాంగ్రెసు నాయకుడు అప్పసాని సందీప్ తో అధికారులు లగడపాటితో రాయబారం జరుపుతున్నారు.

లగడపాటి విజయవాడలో ఆదివారం రాత్రి కొంత దూరం క్వాలిస్ వాహనంలో వెళ్లి తర్వాత కాలి నడకన వెళ్లినట్లు సమాచారం. ఆయన విజయవాడ శివారులో అజ్ఞాతంలో ఉన్నట్లు చెబుతున్నారు. లగడపాటిపై పెట్టినవి చిన్న కేసులేనని విజయవాడ కమిషనర్ రాజేంద్రనాథ్ రెడ్డి చెప్పారు.