లగడపాటి పద్ధతి బాగా లేదు: పొన్నం

హైదరాబాద్: తన సహచర పార్లమెంటు సభ్యుడు లగడపాటి రాజగోపాల్ వ్యవహారశైలి బాగా లేదని కాంగ్రెసు పార్లమెంటు సభ్యుల ఫోరం కన్వీనర్ పొన్నం ప్రభాకర్ అన్నారు. ఒక ప్రజాప్రతినిధి ఇలా వ్యవహరిస్తే విలువలు పడిపోతాయని ఆయన సోమవారం ఒక ప్రైవేట్ టీవీ చానెల్ ప్రతినిధితో అన్నారు. ప్రజాప్రతినిధే ఇలా వ్యవహరిస్తే పరిస్థితి ఏమిటని ఆయన అడిగారు. లగడపాటి క్షేమంపై తాము ఆందోళన చెందుతున్నామని ఆయన అన్నారు. కావాలంటే లగడపాటిని మంచి ఆరోగ్యం కోసం ఢిల్లీలోని అఖిల భారత వైద్య విజ్ఞాన సంస్థ (ఎయిమ్స్)లో కూడా చికిత్స అందిస్తామని, తాను లగడపాటి వెంట ఉంటామని ఆయన అన్నారు.

లగడపాటి మాయం వ్యవహారంలో పోలీసుల వైఫల్యం ఏమీ లేదని ఆయన అన్నారు. ఒక్క ఎంపీ పోలీసులను దబాయించడం పెద్ద వ్యవహారం కాదని, దబాయిస్తే పోలీసులు పక్కకు జరుగుతారని, ప్రజాప్రతినిధులుగా తాము అలా వ్యవహరించడం సరి కాదని ఆయన అన్నారు. లగడపాటి మనసు మార్చుకోవాలని ఆయన కోరారు. లగడపాటి క్షేమం గురించి తాము ఆందోళన చెందుతున్నామని ఆయన చెప్పారు. ప్రజాప్రతినిధి అలా వ్యవహరిస్తే బాధ్యత ఎవరు వహిస్తారని ఆయన అడిగారు. పార్టీ పార్లమెంటు సభ్యుడిగా లగడపాటి కాంగ్రెసు అధిష్టానం నిర్ణయానికి కట్టుబడి ఉండాలని ఆయన అన్నారు.