మనోజ్ షూటింగ్ కు తెలంగాణ దెబ్బ

హైదరాబాద్: ప్రముఖ సినీ నటుడు మోహన్ బాబు కుమారుడు మంచు మనోజ్ కుమార్ సినిమా షూటింగ్ ను తెలంగాణావాదులు మంగళవారం అడ్డుకున్నారు. హైదరాబాద్ సమీపంలోని పేట్ బషీర్ బాగ్ లో తెలంగాణవాదులు ఆయన సినిమా షూటింగ్ ను అడ్డుకున్నారు. తెలంగాణకు వ్యతిరేకంగా వ్యవహరించేవారి సినిమాల కుటుంబ సభ్యుల సినిమాల ప్రదర్శనను అడ్డుకుంటామని తెలంగాణ ఆందోళనకారులు హెచ్చరించారు. ఆ మేరకు చిరంజీవి మేనల్లుడు అల్లు అర్జున్ ఆర్య - 2, మోహన్ బాబు కుమారుడు విష్ణువర్ధన్ సలీం సినిమాల ప్రదర్శనను తెలంగాణ ఆందోళనకారులు అడ్డుకున్నారు.

పోలీసులు చెప్పినా తెలంగాణవాదులు విన్నారు. తెలంగాణ వాదులు నినాదాలతో ముందుకు రావడంతో మనోజ్ లోనికి వెళ్లిపోయారు. మనోజ్ కూడా నచ్చజెప్పడానికి ప్రయత్నించారు. అయినా వారు వినలేదు. తెలంగాణకు వ్యతిరేకంగా తీసుకున్న నిర్ణయాన్ని మార్చుకోవాలని ఆందోళనకారులు డిమాండ్ చేశారు. సినిమాలను అడ్డుకోవద్దని సినీ పరిశ్రమ కోరినప్పటికీ ఆందోళనకారులు వినడం లేదు.