హైదరాబాద్ తెలంగాణ అబ్బ సొమ్మే: జీవన్ రెడ్డి

కరీంనగర్‌: హైదరాబాద్‌ తెలంగాణ అబ్బ సొత్తేనని మాజీ మంత్రి జీవన్‌ రెడ్డి వ్యాఖ్యానించారు. సీమాంధ్ర నేతల రెచ్చగొట్టే మాటలు తెలంగాణేతరులకే నష్టమని బుధవారం ఆయన ఇక్కడ అన్నారు. వ్యాపార అభివృద్ధి కోసమే కొందరు సమైక్యాంధ్ర నినాదం వాడుకుంటున్నారని జీవన్‌రెడ్డి విమర్శించారు. తెలంగాణలో సినిమా షూటింగ్‌లు జరుపుకుంటే ఎవరూ అడ్డుకోరని, తెలంగాణకు వ్యతిరేకంగా రాజకీయ వాదిలా మాట్లాడిన ఎవరికైనా ఇటువంటి దాడులు తప్పవన్నారు.

ఇలా ఉండగా అల్లు అర్జున్‌ సినిమా 'వరుడు' షూటింగ్‌ యూనిట్‌పై టిఆర్‌ఎస్‌, ఎబివిపి కార్యకర్తలు దాడి చేశారు. రామోజీ ఫిలిమ్‌ సిటీ వద్ద షూటింగ్‌ జరుగుతుండగా ఈ దాడి జరిగింది. ఊహించని విధంగా జరిగిన ఈ దాడితో సిబ్బంది పరుగులు తీశారు. దాడి చేసినవారు షూటింగ్‌ సామాగ్రిని ధ్వంసం చేశారు. విషయం తెలిసి పోలీసులు వచ్చేసరికి ఎబివిపి కార్యకర్తలు పారిపోయారు.