రాష్ట్రపతి పాలన: గవర్నర్ గా దిగ్విజయ్?

హైదరాబాద్: తాజా పరిణామాల నేపథ్యంలో రాష్ట్రపతి పాలన దిశగా రాష్ట్రం పయనిస్తున్న సూచనలు కనిపిస్తున్నాయి. తెలంగాణ శాసనసభ్యులు పెద్ద యెత్తున రాజీనామాలకు సిద్ధపడడంతో మళ్లీ రాష్ట్రంలో రాజకీయ సంక్షోభం తలెత్తింది. దాదాపు 60 మంది తెలంగాణ శాసనసభ్యులు రాజీనామాలు చేశారు. ఈ స్థితిలో రాష్ట్రపతి పాలన అనివార్యంగా కనిపిస్తోందనే వార్తలు వస్తున్నాయి. ఇందుకు అనుగుణంగా గవర్నర్ ను కూడా మారుస్తారనే ప్రచారం జరుగుతోంది.

కాంగ్రెసు నాయకుడు దిగ్విజయ్ సింగ్ ను ఎన్డీ తివారీ స్థానంలో గవర్నరుగా పంపే అవకాశాలున్నట్లు చెబుతున్నారు. దిగ్విజయ్ సింగ్ కు రాష్ట్ర పరిస్థితులతో అవగాహన ఉంది. రాష్ట్ర కాంగ్రెసు వ్యవహారాల ఇంచార్జీగా ఆయన పనిచేశారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో కూడా ఆయనకు సన్నిహిత సంబంధాలున్నాయి. కాగా, క్రిస్మస్ తర్వాత ముఖ్యమంత్రి కె. రోశయ్య ఢిల్లీకి వెళ్లే అవకాశాలున్నాయి.