రాజీనామాలకు తెలంగాణ మంత్రులు రెడీ

హైదరాబాద్: తెలంగాణపై కేంద్ర హోం మంత్రి పి. చిదంబరం తాజా ప్రకటన నేపథ్యంలో తెలంగాణకు చెందిన రాష్ట్ర మంత్రులు రాజీనామాలకు సిద్ధపడుతున్నారు. వారు గురువారంనాడు ముఖ్యమంత్రి కె. రోశయ్యను కలిసి తమ అభిమతాన్ని తెలిపారు. పార్టీలకు అతీతంగా తెలంగాణ రాజకీయ నాయకులు జెఎసిని ఏర్పాటు చేసుకున్న నేపథ్యంలో మంత్రులు కూడా రాజీనామాలకు సిద్ధపడినట్లు తెలుస్తోంది. అయితే తాము ఢిల్లీకి వెళ్తామని, ప్రజల అభిమతాన్ని కాంగ్రెసు అధ్యక్షురాలు సోనియా గాంధీకి వినిపిస్తామని మంత్రులు చెబుతున్నారు.

తెలంగాణ మత్రుల రాజీనామాల అభిప్రాయాన్ని ముఖ్యమంత్రి రోశయ్య వ్యతిరేకించారు. మంత్రులుగా ఉంటూ రాజీనామాలు చేస్తే తప్పుడు సంకేతాలు వెళ్తాయని ఆయన చెప్పినట్లు సమాచారం. రాష్ట్రంలో ప్రశాంత వాతావరణం ఏర్పడిన తర్వాత తెలంగాణకు సంబంధించిన అంశంపై ముందుకు సాగవచ్చునని ఆయన సూచించినట్లు తెలుస్తోంది. తెలంగాణకు చెందిన మంత్రులు గురువారం ఉదయం ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ ను కలిశారు. కాగా, హైదరాబాదుకు చెందిన మంత్రులు దానం నాగేందర్, ముఖేష్ గౌడ్ మిగతా తెలంగాణ మంత్రులతో కొంత విభేదిస్తున్నారు.