తెలంగాణపై నిర్దిష్టతకు రాజీనామా: కోమటిరెడ్డి

నల్లగొండ: తెలంగాణపై కేంద్ర హోం మంత్రి పి. చిదంబరం ప్రకటనలో స్పష్టత లేకపోవడం వల్లనే తాను మంత్రి పదవికి, శాసనసభ సభ్యత్వానికి రాజీనామా చేసినట్లు ఐటి మంత్రి కోమటిరెడ్డి వెంకటరెడ్డి చెప్పారు. ఆయన శుక్రవారం నల్లగొండలో మీడియా ప్రతినిధులతో మాట్లాడారు. తెలంగాణ రాష్ట్ర ఏర్పాటు ప్రక్రియకు నిర్దిష్టమైన గడువు విధించాలని ఆయన డిమాండ్ చేశారు.

చిదంబరం ప్రకటనతో ప్రజల్లో అయోమయం, అపోహలు తలెత్తాయని ఆయన అన్నారు. ఆ అపోహలు, అయోమయం వల్లనే తాను రాజీనామా చేశానని ఆయన చెప్పారు. పార్టీలకు అతీతంగా తెలంగాణ శాసనసభ్యులు రాజీనామాలు చేశారని, మంత్రులం కూడా రాజీనామాలు చేశామని ఆయన చెప్పారు. రేపు తాము ఢిల్లీకి వెళ్తున్నట్లు ఆయన తెలిపారు.