పోరులో కెసిఆర్ నామ మాత్రమే: నరేంద్ర

హైదరాబాద్: తెలంగాణ రాష్ట్ర సాధన ఉద్యమంలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు పాత్ర నామ మాత్రమేనని మాజీ మంత్రి, తెలంగాణ ఉద్యమ నేత ఆలే నరేంద్ర అన్నారు. తెలంగాణ సాధన పోరుకు ప్రజలే కారకులని ఆయన శుక్రవారం మీడియాతో అన్నారు. అనారోగ్యం కారణంగానే తాను ఇన్నాళ్లు దూరంగా ఉన్నట్లు ఆయన అన్నారు. తెలంగాణ రాష్ట్ర సాధన కోసం రాజకీయ పార్టీల సంయుక్త కార్యాచరణ కమిటీ (జెఎసి) కార్యక్రమాల్లో తాను పాల్గొంటానని ఆయన చెప్పారు.

యుపిఎ ప్రభుత్వ విశ్వాస పరీక్ష సమయంలో తెలంగాణ ఇస్తామని కాంగ్రెసు అధ్యక్షురాలు సోనియా గాంధీ హామీ ఇచ్చారని, ఆ హామీని నిలబెట్టుకోవడానికి ఆమె చాలా కష్టాలు పడ్డారని ఆయన అన్నారు. తెలంగాణ రాష్ట్ర ఏర్పాటు డిమాండ్ పై రెండో ఎస్సార్సీ వేయాలని అనడం అర్థ రహితమని ఆయన అన్నారు. హైదరాబాద్ తెలంగాణలో అంతర్భాగమని చెప్పారు.