టిడిపి చేవెళ్ల ఎమ్మెల్యే ఆమరణ దీక్ష

హైదరాబాద్: తెలంగాణపై కేంద్ర ప్రభుత్వం వెంటనే స్పష్టమైన నిర్ణయం ప్రకటించాలని డిమాండ్ చేస్తూ చేవెళ్ల శాసనసభ్యుడు కెఎస్ రత్నం శుక్రవారం ఆమరణ నిరాహార దీక్ష ప్రారంభించారు. ప్రత్యేక తెలంగాణకు మద్దతుగా ఆయన ఈ దీక్షను సాగిస్తున్నారు. ఉస్మానియా విశ్వవిద్యాలయంలో విద్యార్థుల ఆమరణ నిరాహార దీక్షలు శుక్రవారం రెండో రోజుకు చేరుకుంది. బంద్ లో సడలింపు ఇచ్చినప్పటికీ తెలంగాణలో నిరనస ప్రదర్శనలు, దీక్షలు సాగుతూనే ఉన్నాయి.

కాగా, తెలంగాణ శాసనసభ్యుల రాజీనామాల పరంపర కొనసాగుతూనే ఉంది. గ్రేటర్ హైదరాబాద్ లోని ఎల్బీ నగర్ కాంగ్రెసు శాసనసభ్యుడు సుధీర్ రెడ్డి బుధవారం రాజీనామా చేశారు. గ్రేటర్ హైదరాబాద్ పరిధిలోని ఎమ్మెల్యేలు కూడా తెలంగాణకు మద్దతుగా రాజీనామాలు చేస్తుండడం గమనార్హం. కాంగ్రెసు శాసనసభ్యులు బిక్షపతి యాదవ్, ఆకుల రాజేందర్, రాజిరెడ్డి కూడా శుక్రవారం తమ శాసనసభా సభ్యత్వాలకు రాజీనామాలు చేశారు. కుత్బుల్లాపూర్ శాసనసభ్యుడు కూన శ్రీశైలం రాజీనామా చేశారు.