తెలంగాణ ప్రక్రియ సాగుతోంది: విహెచ్

హైదరాబాద్: తెలంగాణ రాష్ట్ర ఏర్పాటు ప్రక్రియ ముందుకు సాగుతుందని కాంగ్రెసు సీనియర్ నేత వి. హనుమంతరావు చెప్పారు. తెలంగాణ రాష్ట్ర ఏర్పాటుకు కేంద్ర ప్రభుత్వం త్వరలో గడువు ప్రకటిస్తుందని ఆయన చెప్పారు. ఆయన శుక్రవారంనాడు ఉస్మానియా విశ్వవిద్యాలయానికి వచ్చి విద్యార్థులకు తన సంఘీభావం ప్రకటించారు. తెలంగాణ ప్రక్రియకు నిర్దిష్టమైన గడువు ఇవ్వకపోవడం వల్లనే అంశం మళ్లీ మొదటికొచ్చిందని ఆయన చెప్పారు.

విద్యార్థులు సహనంతో వ్యవహరించాలని ఆయన కోరారు. ఇద్దరు అన్మదమ్ముల మధ్య వివాదం వచ్చినప్పుడు తమ్ముడు తనకు అన్యాయం జరుగుతుందని విడిపోతానంటే పెద్దలు వేరు చేస్తారని, అలాగే తెలంగాణ, ఆంధ్రా ప్రాంతాలు అన్నదమ్ముల్లా విడిపోవాలని ఆయన అన్నారు. తెలంగాణ అంశాన్ని యుపిఎ ఉమ్మడి కార్యాచరణ ప్రణాళికలో చేర్చినప్పుడు గానీ పలు సందర్భాల్లో కాంగ్రెసు హామీ ఇచ్చినప్పుడు గానీ సమైక్యవాదం ముందుకు రాలేదని, అప్పుడు రాని సమైక్యవాదం ఇప్పుడు రావడంలో అర్థం లేదని ఆయన అన్నారు.