బిజెపి జై తెలంగాణ పాట, జై ఆంధ్ర బాట

హైదరాబాద్: ఒక వోటు, రెండు రాష్ట్రాలు అన్న నినాదం గతంలో ఇచ్చిన బిజెపి ఇప్పుడు మరో నినాదం లేవనెత్తుతోంది. తెలంగాణ ఉద్యమంతో పాటే 'జై ఆంధ్ర ఉద్యమం' కొనసాగించాలని బీజేపీ నిర్ణయించింది. దీనికి ఈ నెల 28న విజయవాడ, గుంటూరుల నుంచి శ్రీకారం చుట్టబోతోంది. ఆంధ్ర ప్రాంతవాసులు ఎక్కువగా నివసించే హైదరాబాద్‌లోని కూకట్‌పల్లిలోనూ ఉద్యమాన్ని ఉధృతం చేయబోతోంది. తమ పార్టీ నేత హరిబాబు నేతృత్వంలో విజయవాడ, గుంటూరుల్లో 'జై ఆంధ్ర' ఉద్యమాన్ని ప్రారంభిస్తున్నట్టు పార్టీ రాష్ట్ర అధ్యక్షుడు బండారు దత్తాత్రేయ వెల్లడించారు. జై ఆంధ్ర ఉద్యమం ఊపందుకుంటే తెలంగాణ ఏర్పాటుకు మార్గం సుగమం అవుతుందన్నారు.

మంత్రులు దానం, ముఖేష్‌గౌడ్‌, ఎంఐఎం నేతలు కలిసి హైదరాబాద్‌ను తెలంగాణ నుంచి విడగొట్టడానికి కుట్రలు పన్నుతున్నారని ఆరోపించారు. తెలంగాణ ఉద్యమంలో భాగంగా జనవరి 1న హైదరాబాద్‌లోని ట్యాంక్‌బండ్‌పై పెద్ద ఎత్తున కాగడాల ప్రదర్శన నిర్వహించనున్నట్టు చెప్పారు. సోమవారం 24 చోట్ల నిరసన దీక్షలు, 29న నెక్లెస్‌ రోడ్డులో బతుకమ్మ ప్రదర్శన ఉంటుందని చెప్పారు. తెలంగాణ విషయంలో కాంగ్రెస్‌, టీడీపీలు 'మాక్‌ ఫైటింగ్‌' చేస్తున్నాయని ఎద్దేవా చేశారు.

వైఎస్‌ ఉన్నప్పుడు తెలంగాణకు వ్యతిరేకంగా మాట్లాడిన మంత్రులు ఇప్పుడు అనుకూలమంటూ ప్రజలను మభ్యపెట్టజూస్తున్నారని ఆరోపించారు. సీఎం రోశయ్యకు కాళ్లలో బలం లేకపోయినా నిలబడడానికి ప్రయత్నిస్తున్నారని ఎద్దేవా చేశారు. ప్రస్తుతం రాష్ట్రాన్ని బ్యూరోక్రాట్లే పాలిస్తున్నారన్నారు. తెలంగాణ అంశంపై పొరపాటయ్యిందంటూ టీడీపీ అధ్యక్షుడు చంద్రబాబు ముక్కు నేలకు రాసి లెంపలేసుకుంటే ఆయన చిత్తశుద్ధిని ప్రజలు నమ్ముతారని పేర్కొన్నారు.