కాంగ్రెస్సే ప్రజల పక్షం: రోశయ్య

హైదరాబాద్: ప్రజల పక్షాన నిలిచేది కాంగ్రెసు పార్టీ ఒక్కటేనని ముఖ్యమంత్రి కె. రోశయ్య అన్నారు. కాంగ్రెసు 125వ వ్యవస్థాపక దినోత్సవాల్లో భాగంగా ఆయన సోమవారం కాంగ్రెసు లెజిస్లేచర్ పార్టీ (సిఎల్పీ) కార్యాలయంలో గాంధీజీ చిత్రపటానికి పూలమాల వేసి నివాళులు అర్పించారు. దేశ సమైక్యతను, సమగ్రతను కాపాడడంలో తమ కాంగ్రెసు పార్టీకి మరే పార్టీ సాటి రాదని ఆయన అన్నారు. కాంగ్రెసు ఓడినా, గెలిచినా ప్రజల పక్షాననే ఉంటుందని ఆయన చెప్పారు. ఎందరో మహానుభావుల స్పూర్తితో తమ పార్టీ ముందుకు సాగుతోందని ఆయన అన్నారు.

దేశంలోని సంఘవిద్రోహ శక్తులను, విదేశీ శత్రువులను అంతమొందించే శక్తి కూడా ఒక్క కాంగ్రెసుపార్టీకే ఉందని ఆయన చెప్పారు. దేశ ప్రజలకు రక్షణ కల్పించడంలో తమ పార్టీ లాగా మరే పార్టీ కూడా కల్పించలేదని ఆయన అన్నారు. తమ పార్టీ అధినేత సోనియా గాంధీని విదేశీ మహిళగా అభివర్ణిస్తుండడాన్ని ఆయన వ్యతిరేకించారు. తమ నేత సోనియా విదేశీ మహిళ అని విమర్శించే వారు కాంగ్రెసు పార్టీ వ్యవస్థాపకులు విదేశీయులేనని గుర్తుంచుకోవాలని ఆయన అన్నారు.