ఒయు విద్యార్థుల దీక్షలు భగ్నం

హైదరాబాద్: తెలంగాణ రాష్ట్ర ఏర్పాటుకు రాజ్యాంగ ప్రక్రియను ప్రారంభించాలని డిమాండ్ చేస్తూ హైదరాబాదులోని ఉస్మానియా విశ్వవిద్యాలయంలో విద్యార్థుల దీక్షలను పోలీసులు భగ్నం చేశారు. ఆదివారం అర్థ రాత్రి పెద్ద యెత్తున పోలీసులు మోహరించి విద్యార్థుల దీక్షలను భగ్నం చేశారు. పోలీసులను ప్రతిఘటించడానికి విద్యార్థులు ప్రయత్నించారు. ఈ సమయంలో తీవ్ర ఉద్రిక్తత నెలకొంది. పోలీసులకు, విద్యార్థులకు మధ్య తోపులాట జరిగింది. ఈ సంఘటనలో పలువురు విద్యార్థులు గాయపడ్డారు.

ఆమరణ దీక్షలు చేస్తున్న విద్యార్థులను బలవంతంగా పోలీసులు ఆస్పత్రికి తరలించారు. ఉస్మానియా విశ్వవిద్యాలయం ఆవరణలోకి పోలీసులను అనుమతించలేదు. భారీగా పోలీసులను మోహరించారు. హాస్టళ్లను మూసేశారు. అయితే, హాస్టళ్ల మూసివేత నిర్ణయాన్ని విద్యార్థులు తీవ్రంగా తప్పు పట్టారు. దీనిపై తాము కోర్టుకు వెళ్తామని వారు చెప్పారు. హాస్టళ్లను మూసివేయవద్దని కోర్టు ఆదేశించినా తిరిగి అదే చర్యకు పూనుకుందని వారన్నారు.