నాలుగైదు రోజుల్లో పరిష్కారం: డిఎస్

హైదరాబాద్: తెలంగాణ సమస్యకు నాలుగైదు రోజుల్లో పరిష్కారం లభిస్తుందని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ ఆశాభావం వ్యక్తం చేశారు. జనవరి మొదటివారంలో తెలంగాణపై కేంద్ర ప్రభుత్వం తగిన ప్రకటన చేస్తుందని ఆయన సోమవారం మీడియా ప్రతినిధుల సమావేశంలో అన్నారు. తెలంగాణపై కేంద్ర హోం మంత్రి పి. చిదంబరం చేసిన రెండు ప్రకటనల్లో ఏ విధమైన వ్యత్యాసం కనిపించలేదని ఆయన అన్నారు. రాష్ట్రంలోని పార్టీలు మాట మార్చడం వల్లనే తెలంగాణ రాష్ట్ర ఏర్పాటు ప్రక్రియలో జాప్యం జరుగుతోందని ఆయన చెప్పారు. తెలంగాణ విషయంలో కొన్ని సమస్యలున్నా త్వరలోనే సమసిపోతాయని ఆయన అన్నారు. కొత్త సంవత్సరంలో తెలంగాణకు సానుకూల పరిష్కారం లభిస్తుందని ఆయన అన్నారు. గత 40 ఏళ్లుగా ప్రత్యక్షంగా తెలంగాణ డిమాండ్ వినిపిస్తోందని ఆయన అన్నారు. తెలంగాణ ఆందోళనలు సంతోషంగా చేస్తున్నవి కావని ఆయన అన్నారు.

రాష్ట్ర విభజన సమస్యను సామరస్యపూర్వకంగా పరిష్కరించుకోవడం మంచిదని, ఇరు ప్రాంతాల ప్రజల మధ్య రాగద్వేషాలు తలెత్తడం బాధాకరంగా ఉందని ఆయన అన్నారు. విద్యార్థుల ఉద్యమంలోకి అసాంఘిక శక్తులు ప్రవేశించే ప్రమాదం ఉందని ఆయన అన్నారు. పోలీసులు హద్దు మీరవద్దని ఆయన సూచించారు. పోలీసులు అతిగా ప్రవర్తిస్తే ఆందోళనకారుల్లో ఆవేశం పెరుగుతుందని, అది మంచిది కాదని ఆయన అన్నారు. ప్రభుత్వ కార్యకలాపాలు యధావిధిగా సాగుతున్నాయని ఆయన చెప్పారు. వ్యక్తిగతంగా తాను తెలంగాణకు అనుకూలమైనప్పటికీ పార్టీ అధ్యక్షుడిగా అన్ని ప్రాంతాలవారికీ ప్రాతినిధ్యం వహించాల్సి ఉంటుందని ఆయన చెప్పారు. అన్ని ప్రభుత్వ కార్యకలాపాలు సక్రమంగా సాగుతున్నాయని ఆయన అన్నారు.