తెలంగాణ కోసం అర్ధరాత్రి నుంచి ఆటోల బంద్

హైదరాబాద్: ప్రత్యేక తెలంగాణ ప్రక్రియను తక్షణం ప్రారంభించాలని డిమాండ్‌ చేస్తూ ఈనెల 29వ తేదీ అర్ధ రాత్రి నుంచి రాజధాని, రంగారెడ్డి జిల్లాల్లో ఒక రోజు ఆటో బంద్‌ను విజయంవతం చేయాలని తెలంగాణ ఆటో సంఘాల సంయుక్త కార్యాచరణ కమిటీ ప్రకటించింది. సుమారు అయిదున్నర దశాబ్దాలుగా తెలంగాణ ప్రజలు జరుపుతున్న ఆందోళనలను పట్టించుకోకుండా ఆంధ్ర ప్రతినిధుల ఆధిపత్యంతో కాంగ్రెస్‌ ప్రభుత్వం ప్రత్యేక రాష్ట్ర ఏర్పాటు ప్రక్రియను జాప్యం చేస్తుందని కమిటీ నాయకుడు, ప్రోగెసివ్‌ ఆటో అండ్‌ మోటార్‌ వర్కర్స్‌ యూనియన్‌ ప్రధాన కార్యదర్శి వి. కిరణ్‌ పేర్కొన్నారు.

నెల రోజులుగా తెలంగాణ ప్రాంతంలోని అన్ని వర్గాల ప్రజలు ప్రత్యేక రాష్ట్రం కోసం ఉద్యమిస్తున్న తరుణంలో కేంద్రం, రాష్ట్రంలోని కాంగ్రెస్‌ ప్రభుత్వాలు నిమ్మకు నీరెత్తినట్టు వ్యవహరిస్తున్నాయని విమర్శించారు. రాజకీయంగా అనిశ్చిత పరిస్థితులు నెలకొన్న తరుణంలో కేంద్ర ప్రభుత్వం తక్షణం పార్లమెంట్‌లో తెలంగాణ బిల్లుపెట్టాలని ఆయన డిమాండ్‌ చేశారు.