మహా గర్జన రద్దు కాదు: ఉస్మానియా జెఎసి

హైదరాబాద్: ఉస్మానియా విశ్వవిద్యాలయంలో జనవరి 3వ తేదీన తలపెట్టిన మహా గర్జన సమావేశం జరుగుతుందని ఉస్మానియా సంయుక్త కార్యాచరణ సమితి (జెఎసి) స్పష్టం చేసింది. తెలంగాణపై జనవరి 5వ తేదీన కేంద్ర ప్రభుత్వం తలపెట్టిన అఖిల పక్ష సమావేశంతో తాము సంతృప్తి చెందడం లేదని, అందువల్ల మహా గర్జన యధావిధిగా జరుగుతుందని జెఎసి నాయకుడు సుమన్ గురువారం మీడియా ప్రతినిధులతో అన్నారు. కేంద్ర ప్రభుత్వం తలపెట్టిన చర్చలను బూటకంగా ఆయన అభివర్ణించారు. తెలంగాణ రాష్ట్ర ఏర్పాటు ప్రక్రియలో జాప్యానికే చర్చల వ్యవహారం నడిపిస్తున్నారని ఆయన విమర్శించారు. తెలంగాణ రాష్ట్ర ఏర్పాటు ప్రక్రియకు నిర్దిష్ట కాలపరిమితి విధించి రాజ్యాంగబద్దంగా ప్రక్రియను ప్రారంబించి రాష్టాన్ని ఏర్పాటు చేసే వరకు తమ ఉద్యమం సాగుతుందని ఆయన చెప్పారు.

మహా గర్జన సమావేశానికి వివిధ జిల్లాల నుంచి వచ్చే విద్యార్థులకు ఏ విధమైన ఆటంకాలు రాకుండా తెలంగాణ రాజకీయ నాయకులు చర్యలు తీసుకోవాలని, విద్యార్థులను దగ్గరుండి సమావేశానికి వచ్చేలా చూడాలని ఆయన కోరారు. మహా గర్జన సమావేశానికి జాతీయ నాయకులతో పాటు తెలంగాణ రాజకీయ పార్టీలు, ప్రజా సంఘాల నాయకులు కూడా హాజరవుతారని ఆయన చెప్పారు. మజ్లీస్ కు చెందిన అసదుద్దీన్ ఓవైసీ గానీ అక్బరుద్దీన్ ఓవైసీ గానీ తమ పదవులకు రాజీనామా చేసి గర్జనకు రావాలని వారు కోరారు. తెలంగాణ రాష్ట్ర ఏర్పాటు ప్రక్రియపై కాలయాపనను సహించబోమని ఆయన చెప్పారు.