ఆ మూడు పార్టీలదే పాపం: జూలకంటి రంగారెడ్డి

న్యూఢిల్లీ: తెలంగాణ సమస్య పాపం కాంగ్రెసు, తెలుగుదేశం, బిజెపిలదేనని సిపిఎం మిర్యాలగూడా శాసనసభ్యుడు జూలకంటి రంగారెడ్డి వ్యాఖ్యానించారు. సమస్యను పరిష్కరించాల్సింది కూడా ఆ పార్టీలేనని ఆయన అన్నారు. రేపు తెలంగాణపై కేంద్ర ప్రభుత్వం తలపెట్టిన సమావేశంలో సిపిఎం ప్రతినిధిగా పాల్గొనడానికి వచ్చిన ఆయన సోమవారం మీడియా ప్రతినిధులతో మాట్లాడారు. తెలంగాణ ఇస్తామంటారా, ఇవ్వనంటారా అనేది చెప్పాల్సింది కాంగ్రెసు పార్టీయేనని ఆయన అన్నారు. తెలంగాణ రాష్ట్రం ఇస్తామని చెప్పింది వారేనని, సమస్యను పరిష్కరించాల్సింది వారేనని వారన్నారు.

తెలంగాణ వెనకబాటుకు, అన్యాయానికి కాంగ్రెసు, తెలుగుదేశం పార్టీలేనని, దాని వల్లనే తెలంగాణ రాష్ట్ర ఏర్పాటు డిమాండ్ ముందుకు వచ్చిందని ఆయన అన్నారు. కాంగ్రెసు, తెలుగుదేశం పార్టీలు తెలంగాణ అన్యాయానికి కారణమని, వారే సమస్యను పరిష్కరించాలని ఆయన అన్నారు. ఇదే విషయాన్ని తాము రేపటి సమావేశంలో చెబుతామని ఆయన చెప్పారు.