లగడపాటి రాజగోపాల్ కాళ్లు మొక్కిన తెలంగాణవాదులు

హైదరాబాద్: తెలంగాణ రాష్ట్ర ఏర్పాటును అడ్డుకోవద్దని తెలంగాణవాదులు కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ కాళ్లకు దండాలు పెట్టారు. తెలంగాణ రాష్ట్ర ఏర్పాటును తీవ్రంగా వ్యతిరేకిస్తున్న లగడపాటి సోమవారం ఉదయం శంషాబాద్ విమానాశ్రయం నుంచి ఢిల్లీకి బయలుదేరారు. ఈ సందర్భంగా తెలంగాణవాదులు ఆయనను అడ్డుకోవడానికి ప్రయత్నించారు. ప్రత్యేక తెలంగాణకు అడ్డుపడవద్దని, డిల్లీకి వెళ్లవద్దని తెలంగాణవాదులు లగడపాటిని వేడుకున్నారు.

లగడపాటి కాళ్లకు కొంత మంది తెలంగాణవాదులు దండాలు పెట్టడంపై తెలంగాణ జెఎసి తీవ్రంగా ప్రతిస్పందించింది. తెలంగాణవాదులు ఎవరికీ దండాలు పెట్టాల్సిన అవసరం లేదని, ఎవరినీ వేడుకోవాల్సిన అవసరం లేదని విజ్ఞప్తి చేసింది. పోరాటం ద్వారా తెలంగాణను సాధించుకుందామని స్పష్టం చేసింది.