సినీ పరిశ్రమ చెన్నై పోతుంది: చిరంజీవి

న్యూఢిల్లీ: తెలుగు సినీ పరిశ్రమ చెన్నైకి తరలిపోతుందనే ముఖ్యమంత్రి కె. రోశయ్య మాటల్లో విజం ఉందని తాను కేంద్ర హోం మంత్రి పి. చిదంబరంతో చెప్పినట్లు ప్రజారాజ్యం పార్టీ అధినేత చిరంజీవి తెలిపారు. చిదంబరంతో భేటీ అనంతరం ఆయన బుధవారం మీడియా ప్రతినిధులతో మాట్లాడారు. హైదరాబాదులో సినీ పరిశ్రమ గజగజ వణికిపోతోందని ఆయన అన్నారు. రాష్ట్రంలో శాంతిభద్రతల పరిస్థితి గురించి తాను చెప్పినట్లు ఆయన తెలిపారు. రాష్ట్రంలోని రాజకీయ పార్టీలన్నీ ఐకమత్యంగా ఉండాలని చిదంబరం సూచించారని, అయితే కాంగ్రెసు, తెలుగుదేశం పార్టీల్లోని విభేదాలు తొలగిపోతే పార్టీలు ఐకమత్యంగా వ్యవహరించడానికి వీలుంటుందని ఆయన అన్నారు. రాష్ట్రంలో శాంతిభద్రతల పరిస్థితిని మెరుగుపరచాలని ఆయన చిదంబరాన్ని కోరారు.

సమాజం పట్ల, ప్రజల పట్ల బాధ్యతగా వ్యవహించాల్సిన అవసరం రాజకీయ పార్టీలకు ఉందని ఆయన అన్నారు. ప్రజా జీవనం స్తంభించే విధంగా రాజకీయ పార్టీలు వ్యవహరించకూడదని ఆయన అన్నారు. మంగళవారంనాటి సమావేశం ఒక నిర్ణయం తీసుకునే దిశగా తొలి అడుగని, ఇది శుభపరిణామమని ఆయన అన్నారు. మంగళవారంనాటి సమావేశానికి ముగ్గురు ప్రతినిధులను అనుతించి ఉంటే తెలంగాణ ప్రతినిధిని చేర్చి ఉండేవారమని ఆయన అన్నారు. తెలంగాణ అభిమానులు కూడా తన వెంట ఉంటారని ఆయన అన్నారు.