తెలంగాణపై రాజకీయేతర నిపుణల కమిటీ?

న్యూఢిల్లీ: తెలంగాణపై పడిన పీటముడిని విడదీయడం కేంద్రానికి గగనంగానే ఉంది. రాజకీయ పార్టీల నాయకుల మధ్య ఏకాభిప్రాయం కుదరకపోవడం, ప్రాంతాలవారీగా ఎవరి వాదనలకు వారు కట్టుబడి ఉండడంతో కేంద్రం పరిష్కార మార్గాల కోసం మల్లగుల్లాలు పడుతోంది. ఇందుకు గాను రాజకీయేతర నిపుణుల కమిటీని వేస్తూ కేంద్ర ప్రభుత్వం మరో ప్రకటన విడుదల చేసే అవకాశం ఉన్నట్లు చెబుతున్నారు. తెలంగాణపై గురువారం జరగాల్సిన కేంద్ర మంత్రివర్గ సమావేశం వాయిదా పడింది. పార్టీలో అంతర్గత చర్చ కోసమే మంత్రివర్గ సమావేశాన్ని వాయిదా వేసినట్లు తెలుస్తోంది. కమిటీల ఏర్పాటుకు తెలంగాణవాదులు అంగీకరించడం లేదు. కాలయాపన చేసే కమిటీల ఏర్పాటుకు సమైక్యవాదులు సుముఖంగానే ఉన్నారు. నిర్దిష్ట కాల పరమితితో కూడా విధివిధాలన ప్రకటన కోసం తెలంగాణవాదులు పట్టుబడుతున్నారు. రాష్ట్రంలో శాంతి నెలకొనాలని అఖిల పక్ష సమావేశం విజ్ఞప్తి చేసినప్పటికీ తాము ఆందోళనను విరమించేది లేదని తెలంగాణ జెఎసి ప్రకటించింది. సమైక్యవాదులు మాత్రం ఆందోళన విరమణకు అంగీకరించారు.

రాష్ట్ర ఏర్పాటుకు కచ్చితంగా స్పష్టమైన విధివిధానాలతో కాలపరిమితి విధిస్తూ ప్రకటన చేసే వరకు తెలంగాణలో ఆందోళన సాగిస్తామని తెలంగాణ జెఎసి స్పష్టం చేసింది. దీంతో కేంద్ర ప్రభుత్వం పునరాలోచనలో పడింది. కేంద్ర హోం మంత్రి పి. చిదంబరం బుధవారం తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో, కాంగ్రెసు పార్లమెంటు సభ్యుడు కావూరి సాంబశివ రావుతో చర్చలు జరిపారు. వారితో చర్చల అనంతరం రాజకీయ నాయకులతో సంబంధం లేని కమిటీని వేయాలని, ఈ కమిటీలో వివిధ వర్గాలకు చెందిన నిపుణులను సభ్యులుగా వేయాలని కేంద్ర ప్రభుత్వం నిర్ణయించినట్లు సమాచారం. తొలుత సుప్రీంకోర్టు న్యాయమూర్తితో కమిటీ వేయాలని అనుకుంది. అయితే అందుకు కెసిఆర్ అంగీరించలేదు. కాలయాపన చేసే ఎటువంటి కమిటీలకు కూడా తాము ఆంగీకరించబోమని కెసిఆర్ చెప్పారు. తెలంగాణ రాష్ట్ర ఏర్పాటుకు రోడ్ మ్యాప్ వేయడానికి రాజకీయేతర నిపుణుల కమిటీని ప్రకటించడం మంచిదనే అభిప్రాయానికి కేంద్రం వచ్చినట్లు చెబుతున్నారు.