తెలంగాణలో మావోల పాత్ర లేదు: పాల్వాయి గోవర్దన్ రెడ్డి

హైదరాబాద్: తెలంగాణ రాష్ట్ర ఏర్పాటు డిమాండ్ ఉద్యమంలో మావోయిస్టుల పాత్ర లేదని కాంగ్రెసు సీనియర్ నేత పాల్వాయి గోవర్దన్ రెడ్డి స్పష్టం చేశారు. తెలంగాణ ఉద్యమం మావోయిస్టుల చేతుల్లోకి వెళ్లిందంటూ గవర్నర్ నరసింహన్ కేంద్రానికి తప్పుడు నివేదిక ఇచ్చారని ఆయన గురువారం మీడియా ప్రతినిధులతో అన్నారు. మావోయిస్టులు పిలుపు ఇస్తే ప్రజలు స్పందించలేదని, దీన్ని బట్టి మావోయిస్టులకు ప్రతిస్పందన లేదని అర్థమవుతోందని ఆయన అన్నారు. తెలంగాణ జెఎసి ఇచ్చిన పిలువు మేరకే ప్రజలు స్పందించారని ఆయన అన్నారు. ఉద్యమం ప్రజల చేతుల్లోనే ఉందనడానికి దాన్ని బట్టి చెప్పవచ్చునని ఆయన అన్నారు.

తెలంగాణ రాష్ట్ర ఏర్పాటుకు రాజకీయ ప్రక్రియ ప్రారంభం కావాల్సి ఉందని ఆయన చెప్పారు. తెలంగాణ ప్రాంత ప్రతినిధులు అందరూ రాజీనామాలు ఉపసంహరించుకోవాలని ఆయన కోరారు. ఉద్యమంలో పట్టువిడుపులుండాలని ఆయన అభిప్రాయపడ్డారు. నిర్దిష్ట కాల పరిమితి విధిస్తూ తెలంగాణపై ఒక కమిటీ వేస్తారని తాను భావిస్తున్నట్లు ఆయన తెలిపారు.