వివాదాల పుట్ట ఎస్ఎస్పీ యాదవ్

హైదరాబాద్: ముఖ్యమంత్రి కె. రోశయ్యపై అనుచిత వ్యాఖ్యలు చేసిన ఎస్ఎస్పీ యాదవ్ పై ముఖ్యమంత్రి కె. రోశయ్య చర్యలు తీసుకునే అవకాశం ఉంది. యాదవ్ వ్యవహారాన్ని ప్రభుత్వం తీవ్రంగా పరిగణిస్తోంది. యాదవ్ పై ముఖ్యమంత్రి చర్యలు తీసుకుంటారని రాష్ట్ర రవాణా శాఖ మంత్రి శత్రుచర్ల విజయరామరాజు గురువారం మీడియా ప్రతినిధులతో చెప్పారు. యాదవ్ ను కేంద్ర ప్రభుత్వానికి సరెండర్ చేయవచ్చుననే వార్తలు వినిపిస్తున్నాయి.యాదవ్ కనీసం సెలవు కూడా పెట్టకుండా వెళ్లిపోయినట్లు సమాచారం. తాను ఆగ్రా వెళ్తున్నట్లు ఆయన ఆర్టీసి ఎగ్జిక్యూటివ్ డైరెక్టర్ల సమావేశంలో బుధవారం చెప్పినట్లు వార్తలు వచ్చాయి. కానీ ఆయన ఆగ్రా వెళ్లారా, మరెటువైపైనా వెళ్లారా అనే విషయంపై ప్రభుత్వానికి సమాచారం లేదు. ఈ నెల 2వ తేదీన ముఖ్యమంత్రి ఏర్పాటు చేసిన సమావేశానికి కూడా యాదవ్ హాజరు కాలేదు. ఆయన మొదటి నుంచి ధిక్కారశైలినే అనుసరిస్తూ వస్తున్నారు.

గతంలో కూడా యాదవ్ ఎవరికీ సమాచారం ఇవ్వకుండా వెళ్లిపోయారు. డిజిపిగా ఉన్నప్పుడే ఆయన ఆ విధంగా వ్యవహరించారు. దివంగత ముఖ్యమంత్రి వైయస్ రాజశేఖర రెడ్డికి ఆయన అత్యంత సన్నిహితుడిగా వ్యవహరించారు. ఎన్నికల సమయంలో డిజిపిగా ఉన్న యాదవ్ వైయస్ రాజశేఖర రెడ్డి ప్రభుత్వానికి బహిరంగంగా వత్తాసు పలికారు. దీంతో ఎన్నికల కమిషన్ చర్యలు తీసుకోవడంతో ఆ పదవికి దూరంగా ఉన్నారు. ఎన్నికల్లో గెలిచి వైయస్ తిరిగి అధికార పగ్గాలు చేపట్టిన మరు క్షణమే యాదవ్ ను తిరిగి డిజిపిగా నియమించారు. వైయస్ మృతి సమయంలో కూడా యాదవ్ వ్యవహారశైలిపై వివాదం చెలరేగింది. దీంతో ముఖ్యమంత్రి రోశయ్య యాదవ్ ను డిజిపి పదవి నుంచి తొలగించి ఆర్టీసి ఎండిగా వేశారు. దీంతో యావద్ రోశయ్యపై మండిపడుతున్నారు. నిజానికి వైయస్ తప్ప మరొకరి మాట వినాల్సిన అవసరం లేదనే పద్ధతిలో ఆయన వ్యవహరిస్తూ వస్తున్నారు.