ఉహాజనిత కథనాలు సరి కాదు: చిరంజీవి

హైదరాబాద్: వైయస్ రాజశేఖర రెడ్డి మృతిపై ఒక వెబ్ సైట్లో వచ్చిన కథనం ఆధారంగా తెలుగు టీవీ చానెళ్లు ఊహాజనిత కథనాలను ప్రసారం చేయడం సరి కాదని ప్రజారాజ్యం పార్టీ అధినేత చిరంజీవి అన్నారు. ఆయన శుక్రవారం ఉదయం ముఖ్యమంత్రి కె. రోశయ్యను కలిసి బస్సు చార్జీలు మరింత తగ్గించాలని కోరారు. అనధికారికమైన వైబ్ సైట్ రాసిన కథనాన్ని తీసుకుని, దానిలోని సత్యాసత్యాలను తెలుసుకునే ప్రయత్నం చేయకుండా టీవీ చానెళ్లు ఊహాజనిత వార్తాకథనాలను ప్రసారం చేశాయని ఆయన భేటీ అనంతరం ఆయన అన్నారు. జర్నలిజం బాధ్యతాయుతంగా వ్యవహరించాల్సిన అవసరం ఉందని ఆయన అన్నారు. వైయస్ రాజశేఖర రెడ్డి మృతిపై సిబిఐ దర్యాప్తు జరుగుతోందని, ఆ దర్యాప్తు ఫలితాలను బట్టి స్పందించవచ్చు గానీ ఊహాజనిత కథనాలతో ప్రజలను రెచ్చగొట్టడం సరి కాదని ఆయన అన్నారు.

ఆర్టీసి బస్సు చార్జీలను మరింత తగ్గించే విషయంపై ఆలోచన చేస్తామని ముఖ్యమంత్రి హామీ ఇచ్చినట్లు ఆయన తెలిపారు. పెంచిన ఆర్టీసి చార్జీలను కాస్తా తగ్గించినప్పటికీ ఇంకా తగ్గించాలని కోరామని ఆయన చెప్పారు. ఆర్టీసిలో గత కొన్నేళ్లుగా నష్టాలు పేరుకు పోతున్నాయని, వాటి నుంచి బయటపడడానికి ఆర్టీసి చార్జీలు పెంచకతప్పదని ముఖ్యమంత్రి వివరించినట్లు ఆయన తెలిపారు. అయితే ఒకేసారి అంత పెద్ద మొత్తం చార్జీలు పెంచడం తగదని తాము చెప్పినట్లు ఆయన చెప్పారు. విద్యార్థులపై భారం తగ్గిస్తామని ముఖ్యమంత్రి హామీ ఇచ్చినట్లు ఆయన తెలిపారు.