దేవెగౌడ బూతు తిట్లు: యెడ్యూరప్ప గరం

బెంగుళూర్/న్యూఢిల్లీ: మాజీ ప్రధాని దేవెగౌడ కర్నాటక ముఖ్యమంత్రి యెడ్యూరప్పను అసభ్య పదజాలంతో తిట్టిన సంఘటన తీవ్ర దుమారానికి కారణమైంది. యెడ్యూరప్పను దేవెగౌడ బా..ర్డ్ అంటూ తింటారనే ఆరోపణపై తీవ్ర వివాదం చెలరేగింది. దీనిపై దేవెగౌడ వివరణ ఇచ్చారు. తానలా అనలేదని, తన మాటలను మీడియా వక్రీకరించిందని అన్నారు. అయినా బిజెపి వర్గాలు దేవెగౌడపై మండిపడుతున్నాయి. జెడి (ఎస్) చీఫ్, మాజీ ప్రధాని దేవెగౌడపై దావా వేస్తామని బిజెపి రాష్ట్ర శాఖ హెచ్చరించింది.

యెడ్యూరప్ప తన అనుచరులతో ఆ విషయంపై చర్చించారు. దేవెగౌడపై ఏ విధమైన చర్యలు తీసుకోవాలనేది రాష్ట్ర ప్రజలకు వదిలేద్దామని యెడ్యూరప్ప తన అనుచరులతో అన్నట్లు సమాచారం. దేవెగౌడ బేషరతుగా క్షమాపణలు చెప్పాలని, లేదంటే కోర్టుకెక్తుతామని బిజెపి రాష్ట్ర శాఖ సోమవారం హెచ్చరించింది. తాము దేవెగౌడపై చట్టపరమైన చర్యలు తీసుకుంటామని బిజెపి నాయకుడు ధనంజయ్ కుమార్ చెప్పారు. యెడ్యూరప్పపై చేసిన వ్యాఖ్యలు దేవెగౌడ నిస్ప్పహకు అద్దం పడుతున్నాయని బిజెపి కేంద్ర నాయకుడు ప్రకాష్ జవేదకర్ అన్నారు. దేవెగౌడ ఆరోగ్యం బాగుపడాలని తాను సందేశం పంపుతానని ఆయన వ్యాఖ్యానించారు.