ఎన్టీఆర్ అదుర్స్ ను ఆడనివ్వం: కవిత

హైదరాబాద్: సమైక్యాంధ్రులు నిర్మించిన జూనియర్ ఎన్టీఆర్ హీరోగా నటించిన అదుర్స్ చిత్రాలన్ని తెలంగాణలో ఆడనివ్వబోమని తెలంగాణ జాగృతి ప్రతినిధి, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూతురు కల్వకుంట్ల కవిత హెచ్చరించారు. తెలంగాణలో సినిమా విడుదలకు సహకరించి ఎగ్జిబిటర్లు నష్టపోవద్దని ఆమె ముందే హచ్చరిస్తున్నామని ఆమె సోమవారం మీడియా ప్రతినిధుల సమావేశంలో అన్నారు. కేంద్ర ప్రభుత్వం సూచన మేరకు శాంతి నెలకొల్పడానికే తన తండ్రి కెసిఆర్ మౌనంగా ఉన్నారని కవిత చెప్పారు.

కాగా, అదుర్స్ సినిమా ప్రదర్శనను అడ్డుకుంటామని తెలంగాణ విద్యార్థుల సంయుక్త కార్యాచరణ కమిటీ (జెఎసి) కూడా హెచ్చరించింది. అదుర్స్ సినిమా విడుదలకు ఆటంకాలు కలిగించవద్దని తెలుగు నిర్మాతల మండలి తెలంగాణవాదులను కోరుతున్నారు. సినిమాకు ఏ విధమైన ఆటంకం కలిగించకుండా తాము తెలంగాణ వాదులతో మాట్లాడాలని కూడా యోచిస్తున్నట్లు తెలిపింది.