అదుర్స్ విడుదలకు హైకోర్టు గ్రీన్ సిగ్నల్

హైదరాబాద్: జూనియర్ ఎన్టీఆర్ నటించిన అదుర్స్ సినిమా విడుదలకు రాష్ట్ర హైకోర్టు పచ్చ జెండా ఊపింది. అదుర్స్ సినిమా విడుదలను అడ్డుకుంటామని కొన్ని సంఘాల నాయకులు హెచ్చరించిన నేపథ్యంలో చిత్ర నిర్మాతలు హైకోర్టును ఆశ్రయించారు. ఈ పిటిషన్ లో తెలంగాణ జన జాగృతి కన్వీనర్ కవిత, తెలంగాణ విద్యార్థి సంఘాల జెఎసి నేతలు, రాజకీయ, ప్రజా సంఘాల జెఎసి కన్వీనర్ కోదండరామ్ లను ప్రతివాదులుగా చేర్చారు. ఈ పిటిషన్ పై హైకోర్టు డిజిపి గిరీష్ కుమార్ ను నివేదిక సమర్పించాలని హైకోర్టు ఆదేశించింది. ఈ మేరకు డిజిపి నివేదిక సమర్పించారు.

డిజిపి నివేదికతో సంతృప్తి చెందిన హైకోర్టు సినిమా విడుదలకు గ్రీన్ సిగ్నల్ ఇచ్చింది. సినిమాను ఎక్కువ థియేటర్లలో కాకుండా ఒకటి రెండు థియేటర్లలో విడుదల చేస్తే తాము భద్రత కల్పిస్తామని డిజిపి హామీ ఇచ్చారు. థియేటర్ యజమానులు తమకు రక్షణ కల్పించాలని స్థానిక పోలీసు స్టేషన్లలో లిఖిత పూర్వక విజ్ఞప్తిని సమర్పించాలని డిజిపి సూచించారు.