ఆస్ట్రేలియాలో మరో భారతీయుడిపై దాడి

సిడ్నీ: ఆస్ట్రేలియాలో భారతీయులపై దాడులు కొనసాగుతూనే ఉన్నాయి. ఈసారి సిడ్నీలో దాడి జరిగింది. సిడ్నీలోని బీచ్ లో 28 ఏళ్ల భారతీయుడిపై ఆస్ట్రేలియన్ల గుంపు ఒకటి దాడి చేసింది. యువకులు, యువతులు కూడి భారతీయుడిని చితక బాదారు. బీచ్ లో ఉన్న ఇతరులు భారతీయుడి రక్షణకు రాకుండా చూస్తూ ఉండిపోయారు.

బాధితుడు పోలీసులకు ఫోన్ చేశాడు. వారు తాపీగా 40 నిమిషాల తర్వాత అక్కడికి చేరుకున్నారు. దాడికి గురైన భారతీయుడు 11 ఏళ్లుగా ఆస్ట్రేలియాలో ఉంటున్నాడు. బాధితుడిని ఆస్పత్రికి తరలించారు. వీపు, మెడ, తలపై అతనికి తీవ్ర గాయాలైనట్లు సమాచారం.