తెలంగాణపై శాశ్వత పరిష్కారం: సిఎం

హైదరాబాద్: తెలంగాణ సమస్యకు ముఖ్యమంత్రి కె. రోశయ్య శాశ్వత పరిష్కారాన్ని కోరుకుంటున్నారు. తాత్కాలిక ఉపశమనాలు పనికి రావని ఆయన అభిప్రాయపడుతున్నారు. తెలంగాణకు శాశ్వత పరిష్కారం కనుక్కోవాల్సిన బాధ్యత కేంద్రానిదేనని, తాను కేంద్ర నిర్ణయానికి కట్టుబడి ఉంటానని ఆయన ఒక వార్తాసంస్థకు ఇచ్చిన ఇంటర్వ్యూలో అన్నారు. తెలంగాణపై తనకు వ్యక్తిగతాభిప్రాయాలు లేవని స్పష్టం చేశారు. తెలంగాణ అనుకూల, వ్యతిరేక ఉద్యమాల వల్ల విధ్వంసం జరిగిందని, పరిస్థితులు పునరావృతమయ్యే ప్రమాదం కూడా లేకపోలేదని, అందువల్ల సమస్యకు శాశ్వత పరిష్కారం అవసరమని ఆయన అన్నారు.

ప్రస్తుత సమస్యకు హేతుబద్ద పరిష్కారం ఏముంటుందనే ప్రశ్నకు తమ చేతుల్లో ఏమీ లేదని, కేంద్రమే వివిధ కోణాల్లో ఆలోచించాల్సి ఉంటుందని ఆయన అన్నారు. ఇక్కడ కూర్చుని అవుననో, కాదనో చెప్పేది కాదని, తానో మరొకరో చేసేదైతే ఏదో ఒకటి ఆలోచించేవాళ్లమని, ఇది కేంద్రం దృష్టి పెట్టి పరిష్కరించాల్సిన అవసమని ఆయన అన్నారు. రాష్ట్ర విభజన అంశాన్ని కేంద్రానికి వదిలేయాలని ఆయన అన్ని పార్టీలకు విజ్ఞప్తి చేశారు.