ఎన్టీఆర్ అదుర్స్ పై వెనక్కి తగ్గం: తెరాస

హైదరాబాద్: జూనియర్ ఎన్టీఆర్ నటించిన అదుర్స్ సినిమా ప్రదర్శనను అడ్డుకునే విషయంలో తాము వెనక్కి తగ్గబోమని తెలంగాణ రాష్ట్ర సమితి (తెరాస) శాసనసభ్యుడు రవీందర్ రెడ్డి చెప్పారు. ఇక్కడ పుట్టినంత మాత్రాన, ఈ గడ్డ మీద పుట్టినంత మాత్రాన సరిపోదని, ఈ గడ్డ కోసం ఎన్టీఆర్ ఏం చేశాడనేది కూడా ముఖ్యమని ఆయన మంగళవారం మీడియా ప్రతినిధులతో అన్నారు. తెలంగాణపై జూనియర్ ఎన్టీఆర్ తన స్పష్టమైన వైఖరి ప్రకటించాల్సిందేనని ఆయన అన్నారు.

జూనియర్ ఎన్టీఆర్ తండ్రి హరికృష్ణ సమైక్యాంధ్ర అంటున్నారని, మామ నారా చంద్రబాబు నాయుడు ఏమీ చెప్పకుండా ఇంట్లో కూర్చున్నారని, ఇటువంటి స్థితిలో ఎన్టీఆర్ తాను ఈ గడ్డ మీద పుట్టానని చెప్తే సరిపోదని ఆయన అన్నారు. తెలంగాణ కోసం జూనియర్ ఎన్టీఆర్ ముందుకు రావాల్సిందేనని ఆయన అన్నారు.