పార్టీని వీడడానికి వెనకాడం: జానా

హైదరాబాద్: తెలంగాణ రాష్ట్ర సాధనకు పోరాటం చేయడానికి అవసరమైతే పార్టీని కూడా వదులుకుంటామని కాంగ్రెసు సీనియర్ శాసనసభ్యుడు కె. జానా రెడ్డి అన్నారు. తెలంగాణ కోసం ఒక వైపు పార్టీ అధిష్టానంపై ఒత్తిడి తెస్తూ మరో వైపు పోరాటం చేసేందుకు తాము సిద్ధంగా ఉన్నామని ఆయన మంగళవారం చెప్పారు. తెలంగాణ సాధించే వరకు తాము జెఎసిలో కొనసాగుతామని ఆయన చెప్పారు.కాగా, ఈ నెల 18వ తేదీ వరకు తెలంగాణపై కేంద్రం స్పష్టమైన ప్రకటన చేయకపోతే శాసనసభ వద్ద బైఠాయించి రాజీనామాల ఆమోదానికి స్పీకర్ పై ఒత్తిడి తేవాలని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ప్రతిపాదించారు.

రాజీనామాలపై జెఎసి నిర్ణయం తీసుకునే అవకాశం ఉంది. రాజీనామాలపై తమకు కొంత సమయం కావాలని తెలుగుదేశం, కాంగ్రెసు కొంత సమయం కావాలని అడిగినట్లు సమాచారం. దీంతో రాజీనామాలపై చర్చకు తెలంగాణ జెఎసి రాజకీయ స్టీరింగ్ కమిటీ ప్రత్యేకంగా సమావేశమవుతోంది. జెఎసి నిర్ణయాలకు కట్టుబడి ఉంటామని కాంగ్రెసు, తెలుగుదేశం పార్టీ ప్రకటించాయి. జనవరి 18వ తేదీ నుంచి ఫిబ్రవరి 7వ తేదీ వరకు విద్యార్థుల గ్రామాల పాదయాత్ర చేపట్టాలని నిర్ణయించారు. ఫిబ్రవరి 7వ తేదీన పది లక్షల మందిని సమీకరించి సభ నిర్వహించాలని నిర్ణయించే అవకాశం కూడా ఉంది.